चिल्हेवाडी धरण

चिल्हेवाडी धरणाकडे जाण्यासाठी जवळचे सर्वात मोठे गांव आहे, ओतूर. जुन्नर तालुक्यात राष्ट्रीय महामार्ग क्रमांक २२२ वर ओतूर वसलेले आहे. नारायणगावं आगाराच्या एसटी बसेस ओतूर येथून थेट चिल्हेवाडीला जाण्यासाठी नियमित अंतराने मिळू शकतात. परंतु, या रस्त्याने थेट धरणाच्या बंधार्‍यावर जाता येते त्यामुळे धरणाची संपूर्ण रचना नीट ध्यानात येत नाही. डोंगर टेकडीवरुन अर्थात वरच्या बाजुने धरण पहायचे असल्यास थेट मांदारणे गांव गाठावे लागेल. ओतुरहुन माळशेज कडे जाणार्‍या रस्त्यावर दोन-तीन किमीवर उदापूर हे गांव आहे. तेथून उजवीकडचा रस्ता मांदारणे घाटातून जातो. या मार्गाने जाण्याकरिता ओतुरहून कोपरे-मांडवे ही बस पकडावी व मांदारणॆ घाट उतरल्या वर मांदारणे या गावी उतरावे. इथला पूर्ण परिसर हा डोंगराळ आहे. मांदारणे गावातून उजव्या बाजुचा एक कच्चा रस्ता चिल्हेवाडी धरणाकडे जातो. हा रस्ता दोन ते तीन किलोमीटरचा आहे. स्वतःची दुचाकी असल्यास तो पार करणे सोपे जाते. जसजसे या रस्त्याने आपण पुढे जातो तसतसा दरीचा अंदाज येत जातो. या रस्त्याने शेवटच्या टोकावरील एका टेकडीवर शेतांतून मार्गक्रमण करत गेल्यावर चिल्हेवाडी धरणाचे नयनरम्य दृश्य दिसते. चहु बाजुंनी कडे असल्याने पाणी अत्यंत स्थिर दिसून येते. त्यामुळे पाण्यातील जलचरांनी थोडी जरी हालचाल केली तरी ती या शांत पाण्यात मनोवेधक असते.